ازاى تبقى مبرمج شاطر ؟ وتبدأ طريقك وتكون مبرمج محترف؟؟ النهاردة هنقدم زي دليل أو خطوات تتبعها عشان توصل للإحتراف في البرمجة.
اسمعنى بقى وركز فى الكلام ال جاى تحت كويس اوى.
كيف تصبح مبرمج محترف ؟
1 – ابدأ بلغة open source وابعد عن ال closed source و ال .net في الاول .
ليه بقى ؟؟ لان ببساطه اللغات ال open source من المزايا بتاعتها انك تقدر تعمل داونلود للسورس كود بتاعها وتقراه وتتعلم من اسلوب الناس ال كتبت اللغه دا غير ان ليها community كبير جدا جدا , انا مش بقولك متتعلمش دوت نت بالعكس الدوت نت حاجه قويه جدا وشركات كتير محترمه بتشتغل بيها بس هي الفكره انك تتعلم حاجه open source هيبقى اسهل واسرع وكميه المحتوى المجانى فيه بيبقى كبير جدا وبيبقى قابل للتطوير من اى حد فعلشان كدا بيطور بسرعه كبيره جدا مش بيستنى شركه معينه تحتكره والتطوير بتاعه يقف عليها .
2 – نصيحة مني ليك ابدأ بالبايثون … طب ليه ؟
– البايثون لغة سهلة جدا وقوية جدا .
– المحتوي التعليمي الي علي النت كبير جدا .
– هتقدر تطور نفسك في البرمجة بيها بشكل ملحوظ .
– هتقدر تتعلم اساسيات اللغات التانية .
3 – متشتغلش في اكتر من لغة برمجة في وقت واحد .
4 – ذاكر اللغة كويس وأتدرب كويس قبل ما تفكر تدرس لغة تانية
مش معني انك خلصت الاساسيات بتاعت اللغة ( statements , loops , variables , arrays .. etc . )
انك تسيب اللغة لازم تحل مشاكل كتير جدا عشان تثبت في دماغك لازم تدرب نفسك على منصات زى hackerrank و codewars
5 – اوعي تحفظ كود من غير ماتفهمه لان المبرمج دايما بيطور في الاكواد الي عارفها .
6 – جرب حاجات جديده كل يوم ومتخفش صدقنى الحاجه اللي هتتعبك دلوقت هتلاقى مردودها بعدين.
7 – خليك متابع لاى feature بتنزل فى اللغه ال انت بتتعلمها علشان تكون updated دايما.
8 – شوف الحل لنفس الحاجه باكتر من طريقه واكتر من اسلوب فا كل اسلوب هتتعلم منه حاجه مختلفه سواء فى طريقه الكتابه او ال performance بتاع الكود.
9 – خليك فى community فيه ناس فى نفس تخصصك وشارك معاهم افكارك وخد من افكارهم و متستهونش برأى حد مهما حسيته صغير فساعات المشاكل الكبيره بيكون الحل فيها ابسط مما تتخيل.
10 – حاول تتعلم Linux كويس جدا لانه هيفرق معاك فى كل نواحى شغلك.
11 – اقرأ مقالات كتير على قد ما تقدر فى مواقع زى medium من الحاجات القويه جدا تقدر انك تقرأ عليه مقالات عملاقه وهيوفر عليك وقت كبير جدا فى فهم ودراسه حاجات كتير.
12 – اخر حاجه واهم حاجه بقى لازم تكون بتفتح ال documentation بتاعت اللغه كدا زى ما بتفتح الفيس ولو قدرت اديها كل الوقت وسيبك من الفيس .
طبعا فى نقاط تانيه مهمة بس ان شاء الله هبدأ معاكم بالتدريج علشان ال لسا ها يبدأ من الصفر يبقى فاهم
منقول للإفادة
