فى تحذيرين هامين جداً كل الناس تاخد بالها منهم :
١. اولهم شديد اللهجة وموجة للجنسين بس للبنات اكتر لانهم من الواضح انهم كانوا هما المستهدفين بيه اكتر:
أى بنت توصلها رسالة على فيسبوك سواء من شخص تعرفه او متعرفهوش (خدي بالك انا بقول من اى حد تعرفه او متعرفهوش لان احيانا المخترق ممكن يخترق حساب صديقه او صديق ليكى ويخدعك من خلاله) الرسالة دى بتقول:
“دى صورتك؟؟؟ ” وفيها رابط وباقى الرسالة بيقول: “انا لسه شايفاها حالا قولت انبهك بسرعه مش عارفه اقول ايه بجد”
دا شكل من اشكال خداع مستلم الرسالة انه يقنعك تضغطى على اللينك، متضغطيش على اى روابط موجود فيها، ببساطة لو ضغطتى حسابك هيتسرق وصورك وبياناتك كلها الموجوده داخل الحساب هتتسرق هيا كمان، كل اللى هيحصل بعد كدا هيقابلك موقع مزيف يشبه الفيسبوك ويطلب منك تسجيل الدخول ببياناتك وبعدها البيانات دى هتتسرق ويتم استخدامها.
٢. لو وصلتك اى رسالة على واتساب او اى تطبيق دردشة تانى بتقول:
“نظراً بما تمر به البلاد قررت القوى العاملة ان تمنح كل مواطن مصري مبلغ 500 جنية كمساعدة للأسر الغير قادرة على العمل فى الاوضاع الحالية أدخل بسرعه سجل بياناتك من هنا”
متضغطش على اى روابط لان الرابط هنا هو لاغراض جمع البيانات ولا هوا من القوى العاملة ولا غيره، وزارة القوى العاملة ملهاش غير موقع واحد فقط وهو “www.manpower.gov.eg” واى شئ غيره فهو مستخدم لاهداف التصيد وجمع البيانات والاختراق واستغلال ازمة عالمية كلنا فيها بلا استثناء والضعيف واللى مش فاهم بيتعلق فيها بأى قشايه!
نقلا عن مهندس / Mohamed A. Baset
