الناس اللي كانت بتسأل ايه هو موضوع لعبة بوكيمون جو
البوكيمون هو لعبه جديده نازله علي بلاي ستور في امريكا ..اللعبه بتشغل فيها ال GPS وكاميرا الموبايل وبتمشي كأنك بتصور فيديو .. ببيبتدي يظهر قدامك ع الشاشه المكان اللي الكاميرا مصوراه و اي شخصيه من شخصيات بوكيمون بتاعه زمان زي بيكاتشو واخواته …بتظهرلك ع الشاشه ..وبتجري وانت بتجري وراها.
المهم انك بتمشي وراه …وتتحرك من مكان لمكان عشان تمسكه ..وتجمعهم يعني ممكن تبقي واقف في الصاله والبوكيمون يتحرك يروح الحمام تجري وراه بسرعه وانت ماسك الموبايل ..وتزنقه في البانيو وتحلق عليه.
لحد هنا مفيش مشكله … المشكله والحدث ده بسبب ان البوكيمون ده بيتحرك وبيجري وبيبقي مستخبي في اماكن مختلفه …وحصل ان في امريكا حصلت حوادث طرق بسبب شباب بيعدي الشارع قدام العربيات بسرعه وهو مركز في الموبايل عشان يقفش البوكيمون اللي هو شخصيه افتراضيه قدامك ع الشارع بس بتتحرك مع تحرك كاميرا الموبايل فده خلي العربيات تفادي الاشخاص دي وتلبس في بعض.
ده غير انهم في قسم الشرطه في امريكا بقوا قاعدين في امان الله يلاقوا شاب طويل عريض داخل القسم … وبيقول للظابط بعد اذنك ممكن نحرك المكتب ده عشان البوكيمون مستخبي تحتيه …او ممكن تفتحلي الحجز عشان البوكيمون دخل جوه ومش عارف اجيبه …
ده غير بقي العيال اللي بتطلع تخبط علي جيرانها في نص الليل عشان تدخل تجيب البوكيمون اللي خرج ع السلم ودخل الشقه اللي قصاده …وهو الواد ماشي زي العبيط وراه …
لعبه بوكيمون دي كانت علي ايامنا زمان وكان استيكر ورق كده بيطلع في اللبان والشيبسي باين … وكنا بنشتريهم عشان نجمعه مش عشان ناكلهم ..وكنا بنلعب قمار بيه اللي هو تقلب الصوره علي ضهرها ..وتخبطها بحرفنه معينهبأيدك وانت ..بتقول بعض التعاويز في سرك زي “بيكا بيكاا بيكاتشووو ” فتتقلب الصوره علي وشها سبحان الله … ولازم تقلبها 3 مرات ورا بعض متتاليه عشان تكسب وتقش الصوره اللي مع زميلك ..
المهم ان اللعبه رجعت تاني …وبقت متطوره وع الموبايل …عشان تسحل اجيال تانيه معاها منهم الجيل بتاعي برضه والاجيال الاكبر والاصغر …تسحلهم في كلام فاضي ملوش اي تلاتين لازمه.
بس يا سيدي دي قصه البوكيمون اللي قالبه الدنيا ..
