معروف ان أهم حاجه في موقعك كمطور ويب أو برنامجك انو يكون سريع, لازم الأبليكشن بتاعك ميكونش بيعلق أو بيتأخر عشان يفتح.
(75% من الزوار لو الموقع مفتحش في خلال 3 ثواني بيخرجو برا الموقع وبتخسر الزائر).
ماهو الـ CDN ؟
في خدمة شركات بتقدمها اسمها CDN اختصار Content Deliver Network (شبكة توصيل محتوى).
ممكن نقول ان الخدمة دي بتبقا عبارة عن شبكة, مجموعة من السيرفرات القوية ومتوزعة على مناطق مختلفة حول العالم فتبقي على شكل شبكة مغطية العالم كلو.
الفكرة بقا انك باستخدام الشبكة دي هيبقا الموقع بتاعك في كل سيرفر من دول يعني في كذا مكان حول العالم, بمجرد مايجي مستخدم يفتح الموقع بتاعك, بنشوف أقرب سيرفر ليه ويفتحلو الموقع وبالتالي مش هيتأخر عليه طبعا (زي ماتطلب ديليفري من مطعم جنبك, او انك تطلب ديلفيري من مطعم بعييييد).
يبقا أهمية الشبكة دي انها بتخلي الموقع بتاعك والميديا بتاعت الموقع (صور أو فيديوهات) بتفتح بسرعه, وبالتالي الزوار هيحبو يستخدمو الموقع بتاعك, وبردو هيكون محرك البحث راضي عنك, يعني من السيو استخدام الـ CDN.
فالأفضل دايما انك تستخدم CDN لأي صور وفيديوهات وميديا بشكل عام تخص موقعك.
ازاي بقا توصل للخدمة دي؟
هي ليها اشتراك بفلوس زي شهادة الـ SSL (اتكلمنا عنها في بوست اللي فات) كدا, في شركات كتير بتقدم الـ CDN دا أشهرهم أمازون طبعا وفي شركات بتقدم دا بشكل مجاني بس بحجم معين أو مش بنفس جودة الشركات المدفوعة.
