بسم الله الرحمن الرحيم
كتير من المهندسين اللي بيدرسوا مجال الشبكات بعد ما بيخلصوا الدراسة النظرية بيتوهوا ومبيعرفوش طريقة تطبيق اللي درسوه في الواقع العملي او طريقة تنفيذ اللي درسة علي أرض الواقع في الشركات .
وفي إطار حرصنا علي ربط الدراسة النظرية بالواقع العملي بنقدم ليكم النهاردة طريقة عمل وتنفيذ دومين كنترولر – Domain Controller بشكل عملي والخطوات اللي لازم تتبعها وتراعيها أثناء تنفيذك للدومين والأجهزة اللي هتعملها جوين دومين .
طيب نبدأ ازاي وهل خبرتي في الدومين والفايل سيرفر عامله إزاي والكلام ده كله متقلقش طلما عارف كل الكلام ده بس معملتوش في الـواقع العملي – Real Life فبلاش تقلق وجمد قلبك وتعالي بس هلخصلك الموضوع يا جميل.
أولا هتلاقي بعض المشاكل والعقبات اللي هتاقبل سيادتك وانت في طريقك إنك تحصل علي الخبره دي عملي وده شيء ممتاز جدا.
طبعا وارد جدا يكون جهاز الـسيرفر – Server ده جهاز كمبيوتر عادي ولا هو سيرفر ولا حاجه بس هيقضي الغرض لو حجم الشركه مش كبير وعدد اجهزه صغير. فـ بقدر الامكان حاول تعلي الرامات بتاعتة والهارد يكون حجمه كبير خصوصا لو هتعمل عليه فايل سيرفر – File server وتخلي السيرفر ده يشتغل الاثنين مع بعض وبلاش تقول هجيب هارد تاني واضيفه ع الموجود وهخليه للـ File Server لأن الهارد هيكون حمل علي الجهاز اللي هو اصلا مش سيرفر . فـ بلاش النقطه الحماسيه تخدك هنا وتعمل كده غير الهارد بواحد تاني أكبر يا معلم .
خطوات تنفيذ وإنشاء Domain Controller و Active Directory علي ويندوز سيرفر
أولا :
هتكشف علي كل أجهزة المستخدمين عندك وتشوف حالة الـويندوز- Windows عاملة ازاي واتأكد ان مفيش أي جهاز نازل عليه ويندوز هوم – Windows Home لأن زي ما احنا عارفين إن ويندوز هوم مبيبعملش جوين للدومين فلازم تغيره لونيدوز برو واللي محتاج غيره.
• سواء هتغير الـويندوز – Windows أو لا فـانت محتاج تغير اسماء الاجهزه وترتبها وليكن باسم شركتك واللي هنفترض ان شركتك اسمها ABC يبقي تخلي الاجهزه مثلا ABC1-PC,ABC2-PC وهكذا علشان لما تدخل علي الـ Computer Container تلاقي اجهزتك متربته بشكل جميل وسهل معرفتها.
طيب خلصنا من موضوع اجهزة الـ Client نروح بقي نشوف هنعمل ايه علي البرنس الكبير Server
ثانيا:
• قبل ما تبدأ بنقطة البدايه في السيرفر انت محتاج يا برنس تعمل الـ Documentation بتاعتك واعتبر الامر ده حتمي ولابد منه علشان نكمل مع بعض للأخر يعني هتفتح الاكسلايه بتاعتك وتعمل فيها شيتات كده مثلا:-
Servers, network layout, computers وطبعا هنبدأ مع السيرفر مثلا كده Device name, IP, Service يعني الجهاز اسمه ايه والاي بي بتاعه ايه والسيرفيس اللي شغاله عليه دي ايه دومين ولا فايل سيرفر ولا غيره. عملت كل ده , يلا بينا للخطوه القادمه.
• ابدأ الـ Installation وبعد متخلص اوعي تنس تعمل الثلاث حاجات الاساسيه
(Server name, Static IP, Time Zone) فله السيستم نزل وعملت كده .
• Server Promotion طبعا هنا هنرقي السيرفر بيه علشان يبقي عليه دومين وطبعا مش هاقولك ان اسم الدومين لازم يكون بالشكل ده Domain.local مثلا .
ثالثا:
• نعمل تثبيت لأكتيف ديريكتوري- Active Directory Installation
• Organization Unit وهنا بقي لازم تركز اوي علشان متقع يا معلم لان اللي هتبنيه في الحته دي هو اللي هيكون الاساس بعد كده ان شاء الله . هاقولك تعمل ايه متقلقش كده
• مثلا وعلي حسب الادارات اللي عندك هتعمل OU لكل اداره عندك , وكل OU هتعمل تحتيها 3 OUs تانيين !! اسمع مني بس مثلا الـ HR هتعمل HR OU والثلاثه اللي تحتيها هيكونو كالتالي Users,groups,computer وضحت دلوقتي ! علشان كل اداره لما تحتاج تشوف الاجهزه بتاعتها عدد هم كام او اسمائهم ايه متفضلش تلف جوا الـ Computer container يا سيد المعلمين وهكذا هينطبق علي اليوزرز والجروبس . زي الصورة اللي تحت
رابعا:
• طبعا متنساش علي الاقل تشتري Antivirus محترم علي الاقل للسيرفر بس عارف ده صعب وطلب رخم بس بليز حاول تححقه :).
خامسا:
• بلاش تطلع الدومين سيرفر نت يعني متدلوش جيتواي – Gateway خالص.
سادسا:
• Users, Groups هنا بقي هتلف علي الموظفين عندك وتخلي كل واحد يكتبلك First and last name علشان منخشش في مشاكل الاسماء الغلط.
• بناء علي النقطه السابقه هتعمل create للموظفين كلهم داخل الـ AD خد بالك اليوزرز تحت اليوزرز فولدر اللي اتعمل تحت الاو يو- OU الخاصه بادارته.
• Computer Join وهنا تبتدي تدخل الأجهزه علي الدومين يا برنس!
وبكده يبقي نفذنا مشروع كامل لعمل دومين كونترولر وعمل جوين دومين للأجهزة داخل الشركة بطريقة بتحاكي الواقع العملي اللي موجود جوه الشركات
بقلم مهندس Reda Elassal
وإستنونا في المقال الجاي وطريقة عمل الفايل سيرفر بشكل كامل.
إعمل لايك لينا علي صفحتنا علي الفيس بوك وإشترك في الجروب وتابع كل مقالتنا اول باول
