بسم الله الرحمن الرحيم
السادة متابعي موقع كونكت لتكنولوجيا المعلومات والإنترنت بنستعرض معاكم النهاردة مميزات إستخدام تكنولوجيا الحوسبة الإفتراضية او ما يعرف باسم – Virtualization Technology وايه هي الفايدة اللي هتعود عليك كمسئول نظم معلومات لو طبقتها داخل شركتك او في بيئه العمل الخاصة بيك .
هنقدم في الموضوع ده قائمة بأفضل مميزات هتفيدك لو إستخدمت تقنية الحوسبة الإفتراضية – Virtualization Technology في شغلك.
اولا : تقليل الجهد البشري وتقليل زمن توقف الخدمه
تقنية الحوسبة الافتراضية – Virtualization Technology إستخدامها بيؤدي الي تقليل الجهد البشري ووقت تعطل الخدمة في حالة زي لو هتقوم بتغييرات في الأجهزة الموجودة عندك او هتقوم بعمل اي تعديلات او تحديثات في الهاردوير للاجهزة والسيرفرات داخل شركتك.
وكمان عندك ميزه مهمة جدا وهي سهولة تحديث الفيرشوال ماشينز – Virtual Machines بتاعتك علي سبيل المثال لو عاوز تزود حجم الرامات أو تزود مساحة الهارد ديسك او تضيف هارد ديسك جديد او عاوز تضيف كارت نتروك فكل ده بسيط جدا وسريع فبضغطة صغيرة تقدر تعمل اللي انت عاوزه .
ثانيا : سهولة عملية الدمج او نقل الداتا بين السيرفرات – Ease of Migration
Ease of Migration إستخدامك للفيرشواليزيشن بيديك سهولة ومرونة في عملية نقل الفيرشوال ماشين – Virtual Machine أو نسخة منها لهوست جديد او علي فيزيكال هوست – Physical Host ودي ميزة كويسة جدا في حالة لو إنك بتعمل صيانة للسيرفرات بتاعتك او بتعمل تحديث او هتجيب سيرفر جديد فالفيرشواليزيشن بتسهل عليك الموضوع ده بشكل كويس جدا.
ثالثا:إمكانية أخذ سناب شوت من الفيرشوال ماشين – Snapshots
تتيح ليك الفيرشواليزيشن إمكانية أخذ ما يسمي بالسناب شوت. في حال مثلا لو هتقوم بعمل اي تغيير علي الماشين بتاعتك وخايف ده يتسبب في مشكلة فكل اللي عليك انك تاخد سناب شوت للماشين بتاعتك وده بيحفظلك نسخه منها ولو التعديلات حصل فيها مشكلة تقدر ترجع النسخة اللي قبل التعديلات من ال Virtual Machine Snapshot ودي لوحدها ميزه كبيره جدا.
رابعا : سهولة الأرشفة – Ease of Archiving
لو عندك جهاز مش هتستخدمه تاني او مش محتاجه حاليا كل اللي عليك تاخد منه نسخه كفيرشوال ماشين وتحفظها عندك كأرشيف ولو احتاجتها تاني تقدر في دقايق ترجعها وتشغلها من جديد.
خامسا:سهولة عمل التحديثات والحصول علي ميزات إضافية في حالة إحتياجك
علي سبيل المثال لو بدات في شركة وفي البداية كان عندك فرع واحد بس وبعد فتره البيزنس كبر والفروع كترت وعاوز تعمل تحديث او تضيف خاصية جديدة زي ال
high availability,vMotion فالموضوع سهل كل اللي عليك انك تدفع مقابل الخدمات دي وتعمل تحديث للرخصة بتاعتك وتقدر تستخدمها بشكل فوري .
سادسا: تحسين عملية المتابعة والمراقبة للنتورك واكتشاف الاخطاء
تقنية الحوسبة الافتراضية بتيح ليك سهولة عمل مراقبة ومتابعة – monitoring للاجهزة ومتابعة سجل الاحداث – event log وتسهيل عملية استكشاف الاخطاء واصلاحها – troubleshooting
سابعا : تخفيف عبء العمل والاستفادة القصوي من الاجهزة والمساحة
علي سبيل المثال لو عندك 10 أنظمة مختلفة لكل واحد هتحتاج فيزيكال سيرفر هياخد مساحة ويستهلك كهربا وتكاليف صيانة ومتابعة ولكن العكس في حالة الفيرشواليزيشن ممكن نشغل ال 10 انظمة علي سيرفر او اتنين ونستفيد بكل امكانيات الجهاز ونقلل تكاليف الكهربا والصيانة ونوفر في المساحة اللي هتشغلها الاجهزة داخل غرفة ال IT .
ثامنا:سهولة إدارة الاجهزة عن بعد – Remote Management
الفيرشواليزيشين بتتيح ليك إمكانية إدارة الجهاز بالكامل عن بعد من موقع بعيد بما في ذلك تحديث الموارد زي تزويد الرامات او الهارد ديسك او البروسيسور واستكشاف الأخطاء وإصلاحها على الشبكة وعمليات تشغيل / إيقاف تشغيل الطاقة والمزيد. وده بيزيد من كفاءة إدارة السيرفرات وبيقلل تكاليف السفر والمجهود المبذول وكمان سرعة حل المشاكل.
