نصائح مهمة عشان تكون فريلانسر ناجح

لو أنت فري لانسر أو بتفكر تبقي فري لانسر هنقدم ليكم اليوم 10 نصايح عرفتهم عشان تفيدك و انت دخل مجال الفريلانسر…و يعتبروا مهارات مهمة جدا علشان تبقى فريلانسر ناجح .

1-اتعلم الحاجة اللي عاوز تشتغلها كويس…و اعمل منها كذا نموذج كامل بايدك…

2-ادخل كذا موقع من مواقع Freelancing و اعمل اكونت عليهم.

3-خصص وقت للقعدة علي الحسابات دي …يعني مثلا هتاخد كل يوم تلات ساعات اكتر او اقل براحتك … عشان تتابع الوظايف اللي بتنزل فجأة ..بحيث ينزل اي حاجة تكون من اول المقدمين فيها و ده بيفرق كتير..
ده غير ان تركيزك علي حاجة لفترة معينه هيخليك تاخد خبرة عنها.

4-نقي الوظيفة اللي تحس انها واضحة و مفصله…مش لازم تكون مفسرة كل حاجة مهو لما هيكلمك هيشرح اكتر…لكن اقصد وظيفة ظاهرها انه حد بيطلب تاسك فعلا ..مش حد نصاب يعني و يكون:

محقق طلبات الهوية اللي طالبها منه الموقع علي قد ما يقدر…
مثلا موقع Freelancer بيطلب credit card و الايميل مثلا..يكون هو مدخلهم …
لإن معلش واحد طالب و ظيفة و مش مدخل ال credit card يبقي ناوي يدفع بايه عدم اللامؤاخذة
و بلاش و اكرر..بلاش الايميلات الوهمية …انت هتحسها …و لو شكيت 0.03 في المية انه ايميل مزيف خلاص يبقي مزيف و شوف غيره..الدنيا مليانة و مبتقفش علي حد …و اللي باعنا خسر دلعنا..

حتي هتلاقي الايميل الموثوق بيتقدمله ناس كتير و ال Rate بتاعه كويس..

/*فرضنا فلتنا من حته النصب و الايميلات المزيفة..ازاي اخليه يقبلني انا دونا عن جيش الناس المقدمة دي*/ حبيتش الموضوع اوي

الاغرااااء….مميزاتك هتخليه غصب عنه يدخلك…ازاي اجدع ازاي:

5-اولا بما انك جديد فانت متطلبش سعر عالي …و متقللش اوي برضو …بس خليك اقل من المقدمين .. و بكده تضمن ان الناس اللي هاممها تدفع قليل هتبص عليك …و كده معاك نقطة..

6-طلع طالب الوظيفة برنس و مبيهموش الفلوس…بالنساله شكليات…همه الشغل…قشدة برضو و لا هنتهز…
هتدخل تقوله اول سطر في وصف التقديم بتاعك …
“انا اقدر اوريك نموذج زي اللي انت طالبه”
منغير ما يفكر …هيدخل يقولك …طب وريني …تروح انت يا باشا داخل جايب النماذج اللي عملتها بايدك في رقم 1 و باعتهاله…
عجبه و طلب كان بها ..رفض عادي اسد يلا في ايه

و بكدة الناس اللي بيهمها تشوف الحاجة قبل ما تنفذها هتبص عليك…تاني نقطة..

7-ركز في الموضوع و ابحث عنه كتير و عن افضل الطرق اللي تطور بيها نفسك في الشغل…
و متنساش ان التركيز علي الشيئ بيوصلك ليه باذن الله…

8-خد بالك ساعات شركات هي اللي طالبة التاسك يعني ممكن يطلبوا اكتر من حد ينفذلهم التاسك…فانت فرصتك كويسة …لان في ناس هتطلب اكتر من واحد يشتغلها…تالت نقطة..
/*طب انا عملت كل الاحتياطات دي و برضو اخطأت و كلمت حد من اللي بينصبوا و مدانيش حقي في الآخر*/

9-متزعلش ده وارد ناس كتير اول ما دخلت اتنصب عليها في الفلوس …لكن الحقيقة احنا اللي كسبانين…كسبنا خبرة و لا مكسبناش …بصلي و انا بكلمك كسبنا و لا لا
متعلمتش من التاسك اللي عملته بايدك ده؟
متعلمتش تميز بين الناس ؟
مبتدتش تحترف الموقع اكتر؟
يبقي مين اللي اتنصب عليه
لا احنا جامدين اوي.

10-في النهاية و اهم نصيحة تحطها نصب عينيك (يعني قدام عينك)…هي انك تعرف ان الرزق بيد الله…و انك لو لفيت الارض كلها مش هتاخد سوي ما اراد الله لك …فانت هتعمل كل ده و انت بتتوكل علي الله بقلبك و واثق انه لن يضيعك..
زوجة ابراهيم عليه السلام قالت ايه :
“اذا لن يضيعنا الله”

و ربنا كريم اوي اكتر مما تتخيل .. انت ابدأ بس و شوف …و متقلقش خالص …ليه؟
عشان زي ما الشعراوي قال :
“الجوارح تعمل و القلوب تتوكل”
انت هتشتغل بايدك و قلب مطمئن و واثق بالله انه:
هيكرمك..
لن يضيعك..
سيرزقك..

نقلا عن مهندسة / آلاء الحطاب